✍️दिनेश झाडे
मुख्य संपादक
नागपूर:-७ मे रक्त कर्करोगग्रस्त एका तीन वर्षाच्या बालकाला मुख्यमंत्री वैद्यकीय सहायता निधीतून आर्थिक साह्य मिळाल्याने त्याच्यावर वेळीच उपचार होऊन जीवदान मिळाले आहे.
नागपूरच्या सावित्रीबाई फुले नगर, पार्वती नगरातील रहिवासी असलेल्या विवेक किरण देशमुख या तीन वर्षाच्या बालकाला रक्त कर्करोगाचे निदान झाले आणि त्याच्या माता- पित्याच्या पायाखालची जमीनच सरकली. हातमजुरी करून कुटुंबाचा उदरनिर्वाह करणाऱ्या या पालकांना मुलाच्या उपचाराचा खर्च कसा करायचा, असा प्रश्न पडला होता. त्याला होणाऱ्या वेदनांनी त्यांचे हृदय पिळवटून निघत होते. मुलाचा जीव वाचविण्यासाठी तातडीने केमोथेरपी व इतर आवश्यक उपचार करणे गरजेचे होते.मुख्यमंत्री देवेंद्र फडणवीस यांना या बालकाबाबत कळताच त्यांनी दिलेल्या निर्देशानुसार मुख्यमंत्री वैद्यकीय सहयता निधी अंतर्गत मुलाच्या उपचारासाठी ५० हजार रुपये व अतिरिक्त खर्च म्हणून २ लाख ५० हजार रुपये असे एकूण ३ लाख रुपये आर्थिक मदत तातडीने मंजूर करण्यात आली. या मदतीमुळे व्होकहार्ट रुग्णालयात वेळीच केमोथेरपी आणि अन्य उपचार करण्यात आले. आता या मुलाच्या प्रकृतीत सुधारणा होत आहे. त्याच्या चेहऱ्यावर पुन्हा उमललेले हास्य आमच्यासाठी जगण्याची नवीन उमेद घेऊन आल्याची भावना त्याच्या पालकांनी व्यक्त केली आहे. मुख्यमंत्री वैद्यकीय सहायता निधी कार्यालयाची कायर्पद्धती अत्यंत जलद, संवेदनशील व माणुसकी जपणारी असल्याचा अनुभव आम्हाला आल्याचे त्याच्या पालकांनी सांगितले. या मदतीबद्दल त्यांनी मुख्यमंत्री देवेंद्र फडणवीस, कक्ष प्रमुख रामेश्वर नाईक, नागपूर कक्ष प्रमुख डॉ. सागर पांडे यांचे आभार मानले आहेत.
