बहुजन मेडीकोज असोसिएशनचा उपक्रम ; पाहुण्यांसह सर्व विजेत्यांना संविधानाची प्रस्तावना भेट

✍️राजु गोरे
चंद्रपूर प्रतिनिधी

चंद्रपूर:-क्रांतीज्योती सावित्रीमाई फुले, मां फातिमा शेख आणि राजमाता जिजाऊ या महानायिकांच्या संयुक्त जयंती महोत्सवाचे औचित्य साधून ‘बहुजन मेडीकोज असोसिएशन, चंद्रपूर’ तर्फे आयोजित खुल्या सामाजिक ज्ञान स्पर्धेचा दिमाखदार बक्षीस वितरण सोहळा नुकताच पार पडला. या स्पर्धेत चिमूरच्या आचल नागदेवते हिने प्रथम क्रमांक पटकावून दहा हजार रुपयांचे रोख पारितोषिक, प्रमाणपत्र आणि सन्मानचिन्ह आपल्या नावे केले. तर पोंभुर्णा येथील प्रबुद्ध गोवर्धन याने द्वितीय क्रमांक (७,००० रु.) पटकावला. तृतीय क्रमांक ग्रीष्मा गेडाम व सुरक्षा गोवर्धन (५,००० रु.) या दोघांना प्राप्त झाला.

स्थानिक अग्रसेन भवन येथे रविवार, १८ जानेवारी रोजी आयोजित या सोहळ्याच्या अध्यक्षस्थानी डॉ. धनश्री शेंडे होत्या, तर उद्घाटन डॉ. नेहा चालखुरे यांच्या हस्ते करण्यात आले. प्रमुख मार्गदर्शक म्हणून प्रा. वैशाली तुमराम उपस्थित होत्या. या सोहळ्याचे सर्वात मोठे वैशिष्ट्य म्हणजे, उपस्थित सर्व पाहुण्यांना आणि यशस्वी ठरलेल्या विद्यार्थ्यांना ‘भारतीय संविधानाची प्रस्तावना’ देऊन सन्मानित करण्यात आले. समाजातील प्रत्येक घटकापर्यंत संविधानाची मूल्ये पोहोचावीत, हा यामागचा मुख्य उद्देश होता.

⏩सदर स्पर्धा डॉ. बाबासाहेब आंबेडकर लिखित ‘हिंदू स्त्रियांची उन्नती आणि अवनती’, प्रा. हरी नरके लिखित ‘ज्ञानज्योती सावित्रीबाई फुले’ आणि प्रा. अशोक राणा लिखित ‘स्वराज्य संकल्पिका राजमाता जिजाऊ’ या वैचारिक पुस्तकांवर आधारित होती. मुख्य विजेत्यांसह विश्वजित तलांडे, छकुली कोटरंगे, श्रेया शामराव मिलमिले, मोहन मिलमिले, हेमंत कोयताडे, सचिन पिदुरकर, हर्षदा पिंगे, सुमेधा गोवर्धन, शितल भसारकर, परमानंद चौरे, करण माऊलीकर, अंकिता उराडे, लावण्या मेश्राम, गोविंद मुंडे, अभिनव दुर्गे, लुकेश चलाख, अमीषा अलोणे, किरण वैद्य, ज्ञानेश्वर बुरीवार आणि आशिष गायकवाड या सर्व २० विजेत्यांचा सन्मानचिन्ह, प्रमाणपत्र आणि ‘ग्रंथ’ देऊन गौरव करण्यात आला.

💢यावेळी प्रा. वैशाली तुमराम यांनी आपल्या मार्गदर्शनात म्हटले की, “आजच्या राजकीय आणि सामाजिक स्थितीत स्त्रियांनी आणि तरुणांनी महानायिकांचे विचार कृतीत आणणे हीच खरी गरज आहे.” मंचावर अश्विनी केळकर, डॉ. अनुषा मल्लोजवार, प्रा. सूर्यकांत खणके, शाहीन शेख यांची प्रमुख उपस्थिती होती.

कार्यक्रमाचे प्रास्ताविक डॉ. विवेक बांबोळे यांनी केले. संचालन प्रा. शुभांगी मोहितकर व सुरज दहागावकर यांनी केले, तर आभार प्रदर्शन विशाल शेंडे यांनी केले. कार्यक्रमाच्या यशस्वीतेसाठी बहुजन मेडिकोज असोसिएशनच्या सर्व पदाधिकारी व सदस्यांनी मोलाचे सहकार्य केले.